ଭାରତର ଦକ୍ଷିଣ ବିଘଟନ

 ନିକଟରେ ସଂପନ୍ନ ବିଧାନସଭା ନିର୍ବାଚନର ପରିଣାମ ଆସିବା ପରେ କିଛି ମନ୍ଦବୁଦ୍ଧି ରାଜନୈତିକ ଦଳ ଉତ୍ତର ବନାମ ଦକ୍ଷିଣ (ଭାରତ) ମଧ୍ୟରେ କଥିତ ଭେଦଭାବକୁ ପ୍ରୋତ୍ସାହନ ତଥା ଅଯଥା ପ୍ରଚାର-ପ୍ରସାର କରିବାର ଯଥାସାଧ୍ୟ ପ୍ରୟାସ କରିଥିଲେ । ଉତ୍ତର-ଦକ୍ଷିଣକୁ ବିଚ୍ଛିନ୍ନ କରିବାର ଏ ପ୍ରବୃତ୍ତି କିଛି ନୂଆ ନୁହେଁ । ସଂକୀର୍ଣ୍ଣ ରାଜନୈତିକ ସ୍ୱାର୍ଥ ସାଧନ ହେତୁ ଅନେକ ରାଜନୈତିକ ଦଳ ବିଭିନ୍ନ ସମୟରେ ଏହି ବିଘଟନକାରୀ ବିଷବୃକ୍ଷକୁ ଖାଦ୍ୟ-ଉର୍ବରକ ଯୋଗାଇବାର ଅପପ୍ରୟାସ କରିଆସିଛନ୍ତି । ଏହାକୁ ଆର୍ଯ୍ୟ ବନାମ ଦ୍ରାବିଡ଼, ମୂଳ ଅଧିବାସୀ ବନାମ ବାହାର ଲୋକ, କଳା-ଚମ ବନାମ ଗୋରା, ହିନ୍ଦୀ ବନାମ ଅଣ-ହିନ୍ଦୀ ଆଦିର ବିଚାରର ବିସ୍ତାର କୁହାଯାଇପାରେ । ମତଗଣନା ଦିନ ଯେବେ ଜଣାପଡ଼ିଲା ଯେ ମଧ୍ୟପ୍ରଦେଶ, ଛତିଶଗଡ଼, ରାଜସ୍ଥାନରେ କଂଗ୍ରେସ୍ ହାରୁଛି ଓ ତେଲେଙ୍ଗାନାରେ ଜିତୁଛି, ଅବିଳମ୍ବେ କଂଗ୍ରେସୀ ନେତା ପ୍ରବୀଣ ଚକ୍ରବର୍ତ୍ତୀ ଏକ ସୋସିଆଲ୍ ମିଡିଆ ପୋଷ୍ଟରେ ଲେଖିଲେ- “ଉତ୍ତର-ଦକ୍ଷିଣ ସୀମାରେଖା ଅଧିକ ଚଉଡ଼ା ତଥା ସ୍ପଷ୍ଟ ହୋଇଚାଲିଛି ।” ଅନେକଙ୍କର ତୀବ୍ର ପ୍ରତିକ୍ରିୟା ଆସିବା ପରେ ସେ ଏ ପୋଷ୍ଟକୁ ଡିଲିଟ୍ କରିଦେଇଥିଲେ । ଏଇ ଦିନ କାର୍ତ୍ତି ଚିଦାମ୍ବରମ୍ ପୋଷ୍ଟ କଲା କେବଳ ଦୁଇଟି ଶବ୍ଦ: ‘ଦି ସାଉଥ୍‌’ । ଅଭିପ୍ରାୟ ଥିଲା ଦକ୍ଷିଣ-ଭାରତର ମତଦାତା ଉତ୍ତର-ଭାରତ ତୁଳନାରେ ଅଧିକ ସଚେତନ, ପ୍ରଗତିଶୀଳ ଓ ପରିପକ୍ୱ । ଡିଏମ୍‌କେ ସାଂସଦ ସେନ୍ଥିଲ କୁମାର ସଂସଦରେ ଭାଷିଲେ ‘ଦେଶର ଲୋକେ ଏ କଥା ଉପରେ ବିଚାର କରିବା ଉଚିତ ଯେ, ଭାଜପାର ଶକ୍ତି କେବଳ ଏତିକି ଯେ ସେ ମୁଖ୍ୟତଃ ଗୋମୂତ୍ର ରାଜ୍ୟରେ ଜିତିପାରେ ।’ ଆଗକୁ କହିଲେ- “ଦକ୍ଷିଣ-ଭାରତରେ ଭାଜପା ବିଜୟ ଲାଭ କରିପାରିବ ନାହିଁ, କାରଣ ତାମିଲନାଡ଼ୁ, କେରଳ, ଆନ୍ଧ୍ର, ତେଲେଙ୍ଗାନା ଓ କର୍ଣ୍ଣାଟକରେ ଆମେ ବେଶ୍ ମଜବୁତ୍ ରହିଛୁ ।” ତେଲେଙ୍ଗାନାର ନବନିଯୁକ୍ତ ମୁଖ୍ୟମନ୍ତ୍ରୀ ରେବନ୍ତ ରେଡୀ ତାଙ୍କ ନିଜ ଡିଏନ୍‌ଏକୁ ବିହାରୀ ଡିଏନ୍‌ଏ ଅପେକ୍ଷା ଅଧିକ ଶ୍ରେଷ୍ଠ କହି ଏହି ଉତ୍ତର-ଦକ୍ଷିଣ ବିଘଟନ-ବହ୍ନିରେ କିରୋସିନି ଢାଳିବାର କାମ କରିଥିଲେ । କଂଗ୍ରେସୀଜନଙ୍କ ପ୍ରବୃତ୍ତି ତ ରାଷ୍ଟ୍ର ତଥା ଭାରତୀୟ ସମାଜ ବିରୋଧୀ ହେବା ଏକ ପୁରୁଣା ନିୟମ । କହିବାର ଅଭିପ୍ରାୟ ହେଲା ଏ ଧରଣର ବୟାନ ଅନର୍ଗଳ ବା ବାଚାଳ ହୋଇନଥାଏ, କାରଣ ଏହା ପଛରେ ରହିଥାଏ (ଓ ରହିଛି ମଧ୍ୟ) ନିର୍ବାଚନୀ ଲାଭ-କ୍ଷତିର ଗଣିତ । ସୁଚିନ୍ତିତ ତଥା ସୁନିୟୋଜିତ ରଣନୀତି ।