ମୟୂରଭଞ୍ଜର ମକର ସଂକ୍ରାନ୍ତି

 ମକର ସଂକ୍ରାନ୍ତି ଦିନଠାରୁ ମାଘ ମାସ ଆରମ୍ଭ ହୁଏ । ଇଂରାଜୀ କ୍ୟାଲେଣ୍ଡର ଅନୁସାରେ ଏହା ପ୍ରତିବର୍ଷ ଜାନୁୟାରୀ ୧୪ ତାରିଖରେ ପଡ଼େ । ଏହି ଦିନଟିକୁ ମୟୂରଭଞ୍ଜବାସୀ ମକର ପର୍ବ ରୂପେ ପାଳନ କରନ୍ତି । ପୃଥିବୀର ମକର ସଂକ୍ରାନ୍ତି ଉପରେ ସୂର୍ଯ୍ୟଙ୍କର  ଅବସ୍ଥାନ ହେତୁ ଉତ୍ତର ଗୋଲାର୍ଦ୍ଧରେ ଧୀରେ ଧୀରେ ଦିନବଡ଼ ହୁଏ ଓ ରାତି ସାନ ହୁଏ । ମକର ପର୍ବ ଏକ କୃଷି ଭିତ୍ତିକ ପର୍ବ । ଏହି ସମୟରେ ଖରିଫ ଫସଲରୁ ଶସ୍ୟ ଅମଳ ସରିଥାଏ । ଗୋଟିଏ ପର୍ଯାୟର ଚାଷକାମ ସରିବା ପରେ କର୍ମକ୍ଳାନ୍ତ ଜୀବନରେ ମଣିଷ ଟିକିଏ ଆନନ୍ଦ ଉତ୍ସାହ ପାଇବା ପାଇଁ ଅଣ୍ଟା ଭିଡେ । ବାଉଁଣ୍ଡି, ମକର- ସଂକ୍ରାନ୍ତି, ମକର ବାସି- ଏମିତି ତିନିଦିନ ଧରି ଏଠାରେ ମକର ପର୍ବ ପାଳିତ ହୁଏ । ବାଉଁଣ୍ଡିର ସପ୍ତାହେ ପୂର୍ବରୁ ଠାକୁରଘର, ରୋଷେଇ ଘର, ଭଣ୍ଡାର ଘର, ଗାଈଗୁହାଳ, କୁକୁଡ଼ା ଘର, ଢ଼ିଙ୍କିଶାଳର କାନ୍ଥକୁ ବିଭିନ୍ନ ରଙ୍ଗର ମାଟିରେ ରଙ୍ଗ ଦିଆଯାଏ । କେତେକ କ୍ଷେତ୍ରରେ ଚୂନ ଏବଂ ଅନ୍ୟରଙ୍ଗ ମିଶାହୁଏ । କାନ୍ଥରେ ସୁନ୍ଦର ସୁନ୍ଦର ଝୋଟି ଫୁଲ, ପ୍ରଜାପତି, ପଶୁପକ୍ଷୀ, ଗଛଲତା, ନଦୀ ଝରଣା, ଚନ୍ଦ୍ର ସୂର୍ଯ୍ୟ, ମେଘ ଆଦିର ଚିତ୍ର ଆଙ୍କି ବାସଗୃହଗୁଡ଼ିକୁ ସୁନ୍ଦର ଏବଂ ଆକର୍ଷଣୀୟ କରାଯାଏ । ଘରର ମୁଖ୍ୟ ଦ୍ୱାର ଅଧିକ ସୌନ୍ଦର୍ଯ୍ୟମୟ ହୁଏ । ବାଉଁଣ୍ଡି ଦିନ ବାଉଁଣ୍ଡି ହାଟ ହୁଏ । ମିଠା ଓ ପିଠା ତିଆରି ପାଇଁ ଚାଉଳ, ନଡ଼ିଆ, ରାଶି, ଗୁଡ଼, ଘିଅ, ମସଲା, ଫଳ, ପନିପରିବା, ମାଛମାଂସ, କିଣା ହୁଏ । ଘରର ସମସ୍ତଙ୍କ ପାଇଁ ନୂଆ ପୋଷାକ, ଶାଢ଼ି, ଲୁଗାପଟା,  ଚପଲ, ଅଳତା, ସିନ୍ଦୂର, ଟିକିଲି, ପାଉଡ଼ର ତଥା ପୂଜା ପାଇଁ ଧୂପ, ଦୀପ, ସିନ୍ଦୂର, କର୍ପୂର ଏବଂ ହାଣ୍ଡି ମାଠିଆ, ଝାଡୁ, ବିଛଣା ଆଦି ମଧ୍ୟ କିଣା ହୁଏ । ଏଥିପାଇଁ ୧୫ ଦିନ ପୂର୍ବରୁ ହାଟ ବଜାର ଭିଡ଼ ରହେ । ଦୂର ଦେଶରେ  ରହୁଥିବା ଆତ୍ମୀୟ ସ୍ୱଜନ, ଜ୍ଞାତିକୁଟମ୍ବ ଘରକୁ ଫେରୁଥିବାରୁ ବସ, ରେଳଗାଡ଼ି, ବିମାନବନ୍ଦର ସବୁଠି ଅହେତୁକ ଭିଡ଼ ଲାଗି ରହେ । ଏହି ପର୍ବରେ ସାମାଜିକ ସମ୍ପର୍କ ଦୃଢ଼ିଭୂତ ହୁଏ । ଜୀବନରୁ ଦୁଃଖ ଓ ଅନୁଶୋଚନା ଦୂର ହୁଏ ।